Loading…

आमाका बारेमा

साह्रै अप्ठेरोमा परेँ,
खै ! कसरी गरुँ आमाको परिभाषा ?

बरु सोधेका भए मेरो बारे
सजिलै भनिदिन सक्थेँ
दिनहुँ तिमीले पढ्ने समाचारको
निर्लज्ज पात्र
म हुँ ।

तिम्रो कवितामा उभिने अजङ्गको बिम्ब
जो सधैँ तिम्रै विरुद्धमा रहन्छ
त्यो म हुँ ।

राजनैतिक कारखानामा प्रशोधन भइरहने
अपराधको नायक
म हुँ ।

तिमीले थाहै पाउन नसक्ने गैह्रकानुनी धन्दाहरु,
विना शंका पत्याइदिने असीमित झूटहरु,
आकाशभन्दा फैलो लोभको आँखा,
सगरमाथाभन्दा अग्लो घमण्ड,
कर्तव्यलाई सम्झनै नसक्ने हठीदिमाग,
संवेदनाको लासमाथि हाँसिरहने मानवीयता,
सबैसबै नै म हुँ ।

नसोध्नुसोधी त हाल्यौ
बस्यत्ति भन्न सक्छु
आमासँग रहुन्जेल

सबैभन्दा असल थिएँ ।

तपाईको प्रतिक्रिया

सम्बन्धित समाचार