संखुवासभा । सदरमुकाम खाँदबारीमा रहेको जिल्ला अस्पतालबाट बिरामी बोकेर धरान जाँदै गरेको गाडी अक्करको भीरबाट अरुण नदीमा खस्दा ६ जना बेपत्ता भएका छन् ।

मंगलबार साँझ साढे ८ बजेतिर खाँदबारीबाट धरान हिँडेको को १ ज ३७४९ नम्बरको बोलेरो जीप करिब साढे १० बजेतिर धर्मदेवी नगरपालिकामा पर्ने अक्करको भीरबाट अरुण नदीमा खसेको हो ।

मंगलबार खाँदबारी अस्पतालमा खाँदबारी–९ का प्रमेश थापामगर र उनकी भाउजु कल्पना थापामगरको २ महिनाको छोरा समिर श्रेष्ठ बिरामी भएपछि अस्पताल भर्ना गरिएको थियो ।

प्रमेश मिर्गौलाका बिरामी हुन् भने समिरलाई निमोनिया भएकाले जिल्ला अस्पतालमा उपचार सम्भव नभएकाले धरानस्थित वीपी मेमोरियल स्वास्थ्य विज्ञान प्रतिष्ठान रिफर गरिएको जिल्ला अस्पतालका डा। किसन नेपालीले बताउनुभयो । जीपमा बिरामीको साथमा समिरको आमा कल्पना, प्रमेशका बुबाआमा संगम श्रेष्ठ र सदीक्षा श्रेष्ठ र चालक सन्तोष विश्वकर्मा रहेको बताइएको छ ।

जिल्ला अस्पतालबाट रिफर भएका बिरामी नै बोकेर गएको गाडी दुर्घटना भएको हो अथवा अरु नै गाडी दुर्घटना भएको हो भन्ने बारेमा अहिलेसम्म एकिन हुन नसकेको जिल्ला प्रहरी कार्यालय संखुवासभाका प्रहरी सहायक निरीक्षक (असई) टंक बाह्रकोटीले जानकारी दिए । बाह्रकोटीको अनुसार, घटनाको बारेमा जानकारी प्राप्त हुनसाथ घटनास्थलतर्फ जिल्ला प्रहरी कार्यालयबाट प्रहरी निरीक्षक (इन्स्पेक्टर) सहितको टोली गइसकेको तर मौसम खराबीको कारण सम्पर्क हुन नसकिरहेको बताए ।

रातको समयको दुर्घटना भएकाले बेपत्ताको खोजी कार्य हुन सकेको छैन । अरुण खोलामा बाढी आएका कारण उनीहरुको खोजीमासमेत समस्या भइरहेको छ । घटनाबारे विस्तृत जानकारी आइनसकेको जिल्ला प्रहरी कार्यालय संखुवासभाले जनाएको छ

The post संखुवासभामा बिरामी बोकेको गाडी अरुण नदीमा खस्यो, ६ जना बेपत्ता appeared first on silichung.com.

भोजपुर । भोजपुरमा बस दुर्घटनामा घाईते भएका ३ जनालाई विपी कोइराला स्वास्थ्य विज्ञान प्रतिष्ठान धरान लगिएको छ । गम्भिर घाइते भएका झापा हल्दीवारी गाउँपालिका–५ का वर्ष ३० का सहचालक अर्जुन लिम्वु, मोरङ रतुवामाई–७ घर भएकी २१ वर्षीय सविना गौतम भट्टराई र भोजपुर नगरपालिका–९ वस्ने २४ वर्षीय मनिषा श्रेष्ठलाई थप उपचारको लागि विपी कोइराला स्वास्थ्य विज्ञान प्रतिष्ठान धरान लगिएको जिल्ला प्रहरी कार्यालय भोजपुरले जनाएको छ ।
वाँकी ५ जनाको भने जिल्ला अस्पताल भोजपुरमा उपचार भइरहेको प्रहरीले जनाएको छ । जिल्ला अस्पतालमा भोजपुर नगरपालिका–३ की २२ वर्षीय संगिता प्रधान, १७ वर्षीय अस्मिता श्रेष्ठ, ३१ वर्षीय गोविन्द प्रधान र सोही वडाका ११ वर्षीय वालक विवेक श्रेष्ठको उपचार भइरहेको प्रहरीले जनाएको छ ।
आइतवार विहान भोजपुरको अन्नपूर्णबाट विराटनगरको लागि छुटेको मे १ ख ३१६४ नम्बरको बस मध्यपहाडी लोकमार्गका अन्र्तगत गुप्तेश्वर र सिद्धेश्वरको सिमानमा पर्ने चप्पिरे खोला नजिकै ट्रनिङ्ग काट्ने क्रममा बस भित्तमा ठोकिइ अनियन्त्रित भइ पल्टिएको थियो । बसमा सवार १२ जना मध्ये १० जना घाइते भएको थियो ।

The post अपडेटः भोजपुर बस दुर्घटनामा परेका तीन जनालाई धरान लगियो appeared first on silichung.com.

 भोजपुर । सदरमुकामबाट दक्षिणी हतुवागढी गाउँपालिकाको घोरेटार जाँदै गरेको ट्रयाक्टर दुर्घटना हुँदा ट्रयाक्टर चालक घाईते भएका छन् । भोजपुर सदरमुकामबाट मंगलबार विजुलीको पोल लिएर जाँदै गरेको को २ त ८८६६ नम्बरको ट्रयाक्टर रामप्रसाद राई गाउँपालिका ५, मानेभञ्ज्याङको डढुवामा दुर्घटना हुँदा टेम्के मैयुङ गाउँपालिका ३, अन्नपूर्णका २४ वर्षिय ट्रयाक्टर चालक मनोज विसुन्खे घाईते भएका हुन् ।

ट्रयाक्टर अनियन्त्रीत भएपछि सडकबाट करिब २० मिटर तल खस्दा ट्रयाक्टर चालक मनोजको बाँया कानको माथिल्लो भागमा गहिरो चोट लागेको जिल्ला प्रहरी कार्यालय भोजपुरका ईन्सपेक्टर पाण्डव राजवंशीले बताए । उनको स्वास्थ्य चौकी मानेभञ्ज्याङमा उपचार भईरहेको प्रहरीले जनाएको छ ।

The post भाेजपुरमा ट्रयाक्टर दुर्घटना हुँदा चालक घाईते appeared first on silichung.com.

काठमाडाै ।  ताप्लेजुङमा भएको हेलिकप्टर दुर्घटनामा परेका पर्यटन मन्त्री रवीन्द्र अधिकारीसहित सबैको मृत्यु भएको पुष्टी भएको छ ।

बुधबार अपरान्ह पौने १ बजे ताप्लेजुङको चुहानडाँडामा एयर डानेस्टीको हेलिकप्टर दुर्घटनाग्रस्त भएको हो । दुर्घटनामा परि हेलिकप्टरमा सवार मन्त्री अधिकारीसहित प्रधानमन्त्रीका निजी सचिव युवराज दाहाल, यति एयरलाइन्सका अध्यक्ष आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक विरेन्द्रप्रसाद श्रेष्ठ, नेपाल नागरिक उड्डयन प्राधिकरणका इन्जिनियर ध्रुवदास भोछिभया, मन्त्री अधिकारीका पीएसओ अर्जुनकुमार घिमिरे र क्याप्टेन प्रभाकर केसीको निधन भएको हो ।

यसैबीच गृहमन्त्रालयले केही बेर अघि पत्रकार सम्मेलन गरी हेलिकप्टरमा सवार सबै ७ जनाको निधन भएको र सबै शव प्राप्त भएको जानकारी गराएको छ । मन्त्री अधिकारी र उहाँका पीएसओको शव चिन्न सक्ने अवस्थामा रहेको मन्त्रालयले जनाएको छ । उद्धारका लागि नेपाली सेनाको हेलिकोप्टर त्यसतर्फ गएको मन्त्रालयले जनाएको छ । सबैको मृत्यु भएको पुष्टी भएपछि अहिले बालुवाटारमा मन्त्रिपरिषद्को आकस्मिक बैठक बसिरहेको छ ।

पाथिभराबाट तेह्रथुममा रहेको चुहानडाँडा विमानस्थलको अवलोकनका लागि उडेको हेलिकप्टर पाथिभरा नजिकै तारेभिरमा दुघर्टना भएको हो ।  एएमआई अल्फा माइक इन्डिया कल साइनको दुघर्टनाग्रस्त हेलिकप्टर आज बिहान साढे ८ बजे काठमाडौँबाट ताप्लेजुङ गएको थियो ।

दुर्घटनास्थलमा पुगेका रतन कार्कीले हेलिकप्टरको दुई वटा पङ्खा मात्र बाँकी रहेको र अन्य भाग जलेर नष्ट भएको बताउनुभयो । कार्कीले  भने अहिले मानिसका शवहरु बलिरहेको र हेलिकप्टरको अन्य भाग जलेर नष्ट भएको फोनमार्फत जानकारी दिए।

पाथीभरा फेदीदेखि १ घण्टा ३० मिनेटको समयमा पुगिने पाथीभराको उत्तरपट्टिको मोहोडामा पर्ने भिरमा पाथीभरा देवीको मन्दिरदेखि हेलिकप्टर उडेको ३ मिनेटमा ठूलो आवाज आएको प्रत्यक्षदर्शीले बताएका छन् ।

The post हेलिकप्टर दुर्घटनामा अघिका मन्त्री अधिकारीका तश्विरहरु appeared first on silichung.com.