अमेरिकी सेनाको इन्डो प्यासिफिक कमाण्डका कमाण्डिङ जनरल चार्ल्स ए फ्लिनले जंगी अड्डाको भ्रमण गरेका छन्। चार्ल्स ए फ्लिनको सम्मानमा नेपाली सेनाले जंगी अड्डा परिसरमा सम्मानगारत अर्पण गरेको छ। यस्तै नेपाली सेनाको अपरेशनल गतिविधिका बारेमा प्रस्तुतीकरण गरेको छ।
त्यस क्रममा चार्ल्स ए फ्लिन र प्रधान सेनापति प्रभुराम शर्माबीच भेटवार्ता भएको छ। प्रधान सेनापतिको कार्यकक्षमा भएको भेटमा द्विपक्षीय हित तथा पारस्परिक सम्बन्धबारे छलफल भएको जनसम्पर्क तथा सूचना निर्देशनालयले जनाएको छ।
शुक्रबार जंगी अड्डा पुगेका उनी शनिबार हिमाल दृश्यावलोकनका लागि माउन्टेन फ्लाइटमा जाने छन्। उनले आइतबार पाँचखालस्थित नेपाली सेनाको वीरेन्द्र शान्ति कार्य तालिम केन्द्र र शिवपुरीस्थित सैनिक कमाण्ड तथा स्टाफ कलेजको भ्रमण गर्नेछन्।
चार्ल्स ए फ्लिनसहितचको भ्रमण टोली आइतबार नै स्वदेश फिर्ता हुने सेनाले जनाएको छ। अमेरिकाका सैनिक अधिकारीहरुको भ्रमणले दुई देशबीचको सैनिक सम्बन्धलाई थप प्रगाढ बनाउने सेनाको विश्वास छ।
