लण्डन : प्रधानमन्त्री केपी ओली बेलायतको तीन दिने औपचारिक भ्रमण पूरा गरेर बुधबार दिउँसो लण्डनबाट फ्रान्सतर्फ लागेका छन् । उनी युरो ट्रेनमा फ्रान्स लागेका हुन् ।
सोमबार बेलुका बेलायत आइपुगेका प्रधानमन्त्री ओलीले मंगलबार बेलायती राजकुमार ह्यारी, प्रधानमन्त्री टेरिसा मे, प्रमुख विपक्षी लेबर पार्टीका नेता जेरेमी कोर्बिन, सांसदहरु सहितका उच्च बेलायती अधिकारीहरुसँग भेटवार्ता गरेका थिए ।
ब्रेक्जिटका कारण उत्पन्न चरम राजनीतिक अस्थिरता र प्रधानमन्त्रीको बहिर्गमनको मुखैमा भएको नेपालका प्रधानमन्त्रीको भ्रमणका क्रममा दुई देशबीच कुनै पनि सम्झौताहरु भने हुन सकेनन् । लण्डनबाट रेलमार्ग हुँदै फ्रान्स प्रस्थान गर्नुअघि प्रधानमन्त्री ओलीले लण्डनस्थित नेपाली दूतावासले उनको सम्मानमा आयोजना गरेको समारोहलाई सम्बोधन गर्दै भने, ‘नेपालको सबैभन्दा पुरानो मित्र राष्ट्रका रुपमा नेपाल र नेपालीहरुको हृदयमा बेलायतको विशेष स्थान रहेको छ ।’
बेलायती प्रधानमन्त्रीको निमन्त्रणामा सम्पन्न आफ्नो बेलायत भ्रमणले दुई देशबीच रहँदै आएको घनिष्ठ सम्बन्धलाई थप बलियो बनाएको भनाइ प्रधानमन्त्रीको थियो । बेलायत नेपालको सबैभन्दा पुरानो मित्रराष्ट्र हो । ‘दुईसय वर्षअघि स्थापना भएदेखि नै हाम्रो सम्बन्ध मित्रता, सद्भाव र आपसी समझदारीको जगमा विकसित हुँदै आएको छ,’ प्रधानमन्त्रीले भने , ‘यस अवधिमा बेलायतले हामीलाई दिंदै आएको सम्पुर्ण सहयोगहरुका लागि हामी कृतज्ञ छौँ । बेलायतसँगको यो मित्रतालाई भविष्यमा पनि हामी उच्च महत्वका साथ निभाउँदै जानेछौं ।’ नेपालले बेलायतसँगको आपसी सहकार्यलाई अब एक आर्थिक साझेदारका रुपमा अगाडि बढाउन चाहेको उनले बताए ।
‘बेलायत असजिलो परिस्थितिमा पनि नेपालको मित्र हो । जुन कुरा भूकम्पका बेला बेलायतले पु¥याएको सहयोगले प्रमाणित गरेको छ,’ प्रधानमन्त्रीले भने । नेपाल सरकारले लिएको आर्थिक समृद्धिको लक्ष्य हासिल गर्नमा विदेशमा बस्ने नेपालीहरुको महत्वपुर्ण भुमिका रहने धारणा प्रधानमन्त्रीले व्यक्त गरे । नेपालको लागि डायस्पोराका नेपालीबाट हुंदै आएको महत्वपुर्ण योगदानको उनले प्रशंसा गरे ।
विदेशमा बस्ने नेपालीहरुलाई ज्ञान, सीप आर्जन गरेर स्वदेश फर्किन आग्रह गर्दै प्रधानमन्त्रीले भने, विदेशमा बसेर तपाईंहरुले र विभिन्न ज्ञान, सीप आर्जन गर्नुहोस् । यहाँका कारोबारहरु पूरा गर्नुहोस् र सकेसम्म छिटो नेपाल फर्किनुहोस् । बेलायती सेनामा कार्यरत गोर्खाहरुको वीरता र योगदानको प्रशंसा गर्दै प्रधानमन्त्रीले बेलायत र नेपालबीचको मैत्रीपुर्ण सम्बन्धको प्रमुख आधार नै गोर्खाहरु रहेको जनाए ।
बन्दुक देख्दा नतर्सिनेहरु खुकुरी देख्दा तर्सिन्छन् भन्दै प्रधानमन्त्रीले गोर्खाहरुले नेपालीहरुको इमान्दार र वीरतापुर्ण छविलाई संसारभर फैलाउने काम गरेको बताए । त्यसअवसरमा बेलायतको एसिया प्यासिफिक हेर्ने राज्य मन्त्री मार्क फिल्डले प्रधानमन्त्री ओलीको बेलायत भ्रमणलाई २ देशबीचको प्रगाढ सम्बन्धको उदाहरणका रुपमा व्याख्या गरेका थिए ।
सोमबार साँझ लण्डन आइपुगे लगत्तै प्रधानमन्त्री ओलीले अक्सफोर्ड विश्वविद्यालयमा सम्बोधन गरेका थिए । मंगलबार उच्च बेलायती अधिकारीहरुको साथै उनले बेलायतस्थित भूपू गोर्खा, नेकपा कार्यकर्ता, गैरआवासीय नेपाली संघ एवं ब्रिटेन–नेपाल चेम्बर अफ कमर्सका प्रतिनिधि लगायतका नेपालीलाई पनि भेटेका थिए । प्रधानमन्त्रीलाई मंगलबार साँझ बेलायती सेनाको गोर्खा ब्रिगेडको मुख्यालयमा गार्ड अफ अनर प्रदान गरिएको थियो ।
