दाङ । नेपाल कम्युनिष्ट पार्टी (प्रचण्ड–माधव समुह) का अध्यक्ष माधवकुमार नेपालले प्रधानमन्त्री केपी शर्मा ओलीले फुटपाथमा हिँड्नेलाई केन्द्रिय सदस्य बनाएको आरोप लगाएका छन् ।
शनिबार आफू पक्षीय अगुवा कार्यकर्ता भेलालाई सम्बोधन गर्न तुलसीपुर पुगेका नेपालले ओलीले पार्टीको विधान र संविधान कुल्चेर प्रतिनिधिसभा विघटन गरी सन्की शासकको परिचय दिएको पनि टिप्पणी गरे । नेपालले भने, ‘केपी ओली कम्युनिष्ट आचारण भएको मान्छे नै होइनन्, उनी त पार्टीको विधान र मुलुकको संविधान नै नमान्ने सन्की शासक हुन्’
आफ्नो गुटमा आउने जोकोहीलाई पनि केन्द्रीय सदस्य बनाएर ओलीले केन्द्रीय सदस्य पदको गरिमा नै घटाएको उनले टिप्पणी गरे । ‘केपी ओलीले हैसियत नै नभएकालाई पनि केन्द्रीय सदस्य बनाउँदै हिँडेका छन्,’ उनी भन्छन्, ‘राम्रा मान्छे केपीले केन्द्रीय सयदस्य बनाइदिने डरले बालुवाटारको बाटो नै हिँड्न छाडिसके’
कार्यकर्ता भेलामा प्रचण्ड–माधव समूहका प्रवक्ता नारायणकाजी श्रेष्ठले प्रधानमन्त्री ओलीले प्रतिनिधिसभा विघटन गरेर संविधान र लोकतन्त्रमाथि प्रहार गरी गणतन्त्र नै मास्न खोजेको आरोप लगाए ।
