अमेरिकाले रुसी झण्डावाहक तेल ट्याङ्कर कब्जा गरेको छ । एटलान्टिक महासागरमा दुई हप्ताभन्दा बढी समय चलेको लुकामारीपछि अमेरिकी सेना र कोस्ट गार्डले भेनेजुएलासँग सम्बन्धित रुसी झण्डावाहक एउटा तेल ट्याङ्कर जफत गरेको समाचार एजेन्सी रोयटर्सले जनाएको छ ।
यो अपरेशनका क्रममा नजिकै एउटा रुसी पनडुब्बीले उक्त ट्याङ्करको निगरानी गरिरहेको दुई अमेरिकी अधिकारीहरूले रोयटर्सलाई बताएका छन् । अमेरिकी अधिकारीहरूले बताएअनुसार, यो अपरेशन राष्ट्रपति डोनल्ड ट्रम्पद्वारा भेनेजुएलामाथि लगाइएको समुद्री ’नाकाबन्दी’लाई कडाइका साथ लागु गर्ने दिशामा एउटा ठूलो कदम हो ।
हालसम्मको इतिहासमा अमेरिकी सेनाले रुसी झण्डा बोकेको जहाज जफत गरेको यो पहिलो घटना भएको देखिन्छ । यस ट्याङ्करलाई पहिले ‘बेला–१’ नामले चिनिन्थ्यो । तर, अहिले यसको नाम परिवर्तन गरेर ‘मारिनेरा’ राखिएको छ । यो हाल रुसी झण्डाका साथ दर्ता गरिएको छ ।
ट्याङ्करले अमेरिकाको समुद्री नाकाबन्दीलाई छक्याएर उम्कने प्रयास गरेको थियो र अमेरिकी कोस्ट गार्डद्वारा जहाजमा चढ्ने प्रयासलाई पनि विफल तुल्याइदिएको थियो । त्यसपछि एटलान्टिकमा दुई हप्तासम्म यसको पिछा गरियो ।
अमेरिकी सेनाको युरोपेली कमान्डले सामाजिक सञ्जाल ‘एक्स’मा पोस्ट गर्दै ट्रम्प प्रशासनले अमेरिकी प्रतिबन्ध उल्लंघन गरेको आरोपमा उक्त जहाज जफत गरिएको जानकारी दिएको छ । अमेरिकी रक्षा सचिव पिट हेगसेथले सो पोस्टको जवाफ दिँदै लेखेका छन्, “प्रतिबन्धित र अवैध भेनेजुएलाको तेलमाथिको नाकाबन्दी विश्वको जुनसुकै स्थानमा पनि पूर्ण रूपमा लागु रहनेछ ।”
जतिबेला अमेरिकी सेनाले यो अपरेशन सञ्चालन गरिरहेको थियो, त्यतिबेला एउटा रुसी सैन्य जहाज र एउटा रुसी पनडुब्बी पनि सोही क्षेत्रमा उपस्थित थिए, जसले गर्दा टकरावको खतरा पैदा भयो । यो जफत राष्ट्रपति डोनल्ड ट्रम्पको त्यो आदेशको हिस्सा हो, जसअन्तर्गत उनले भेनेजुएलाका सबै स्वीकृत तेल ट्याङ्करहरूलाई पूर्ण रूपमा नाकाबन्दी गर्ने निर्देशन दिएका थिए ।
‘मारिनेरा’ बाहेक, अमेरिकी कोस्ट गार्डले ल्याटिन अमेरिकी जलक्षेत्रमा भेनेजुएलासँग सम्बन्धित अर्को एउटा ट्याङ्करलाई पनि नियन्त्रणमा लिएको छ । यी कारबाहीहरूको उद्देश्य भेनेजुएला सरकारको आयको मुख्य स्रोत (तेल निर्यात) लाई पूर्ण रूपमा बन्द गर्नु र उनीहरूमाथि आर्थिक दबाब बढाउनु हो ।
जहाज अब कहाँ जान्छ ?
यो जफत प्रक्रिया अमेरिकी विशेष सेनाले शनिबार बिहान सबेरै कराकसमा छापा मारी राष्ट्रपति निकोलास मादुरोलाई पक्राउ गरी अमेरिका लगेको केही दिनपछि भएको हो । मादुरोलाई लागुऔषध तस्करीको आरोपमा मुद्दा चलाउन अमेरिकी सेनाले संघीय अधिकारीहरूको जिम्मा लगाएको छ ।
जफत गरिएको ट्याङ्कर अब कहाँ लगिन्छ भन्ने स्पष्ट छैन । तर, स्रोतहरूका अनुसार यो सम्भवतः बेलायती जलक्षेत्रमा प्रवेश गर्नेछ । बेलायतको रक्षा मन्त्रालयले यसबारे टिप्पणी गर्न अस्वीकार गरेको छ । गत महिना कोस्ट गार्डले यसलाई रोक्ने प्रयास गर्दा यो रुसी झण्डाअन्तर्गत दर्ता भई आफ्नो नाम ‘मारिनेरा’ राखिएको थियो ।
यसैबीच, अमेरिकी कोस्ट गार्डले ल्याटिन अमेरिकी जलक्षेत्रमा भेनेजुएलासँग सम्बन्धित अर्को ट्याङ्कर ‘एम सोफिया’ लाई पनि नियन्त्रणमा लिएको छ । पानामाको झण्डा बोकेको यो सुपरट्याङ्कर ट्रान्सपोन्डर बन्द गरी ‘डार्क मोड’ मा भेनेजुएलाको तेल लिएर चीनतर्फ जाँदै थियो ।
रूसले पहिले नै भेनेजुएलाप्रति आफ्नो सुरक्षा प्रतिबद्धताहरू दोहोर्याइसकेको छ । रुसी झण्डा भएको जहाजलाई जफत गर्ने अमेरिकी प्रयासले कूटनीतिक सम्बन्धलाई थप बिगार्न सक्छ, विशेष गरी जब रुसी युद्धपोतहरू नजिकै उपस्थित छन् ।
