चितवन, १० असार ।
चितवनमा जारी राष्ट्रिय स्वतन्त्र पार्टी (रास्वपा) को प्रथम ऐतिहासिक राष्ट्रिय महाधिवेशन अन्तर्गत केन्द्रीय निर्वाचन आयोगले मतदानको संशोधित कार्यतालिका सार्वजनिक गरेको छ। महाधिवेशनको बन्दसत्र र आन्तरिक तयारीको समय व्यवस्थापनका लागि आयोगले निर्वाचन तालिकामा हेरफेर गरेको हो।
केन्द्रीय निर्वाचन आयोगका प्रमुख भुवन केसीका अनुसार पहिलो चरणका लागि सार्वजनिक गरिएको उम्मेदवारहरूको प्रारम्भिक सूचीमा ३८४ जना चुनावी मैदानमा उत्रिएका छन्। यसै टोलीबाट महाधिवेशनले ९९ जना केन्द्रीय सदस्य निर्वाचित गर्नेछ।
संशोधित निर्वाचन कार्यतालिका (Time-Line)
आयोगले आज (बुधवार) दिउँसोदेखि राति मतदान प्रक्रिया सुरु गर्नेसम्मको संशोधित समय तालिका यस प्रकार निर्धारण गरेको छ:
-
दिउँसो ३:३० बजे: उम्मेदवारहरूको प्रारम्भिक नामावली प्रकाशन (सम्पन्न)।
-
साँझ ५:०० बजे: महाधिवेशन प्रतिनिधिहरूको अन्तिम नामावली पार्टीको आधिकारिक वेबसाइट, ह्वाट्स्याप ग्रुप र महाधिवेशनस्थलमा सार्वजनिक।
-
साँझ ५:०० बजेसम्म: उम्मेदवारहरू विरुद्ध दाबी-विरोध (उजुरी) दर्ता गर्ने समय।
-
साँझ ५:०० देखि ५:३० बजेसम्म: परेका दाबी-विरोध र उजुरीहरूमाथि आयोगद्वारा जाँचबुझ गर्ने समय।
-
साँझ ६:०० बजेसम्म: उम्मेदवारहरूले आफ्नो नाम फिर्ता लिन पाउने समय।
-
बेलुका ६:३० बजे: उम्मेदवारहरूको अन्तिम नामावली प्रकाशन।
-
बेलुका ६:४५ बजेदेखि: निर्वाचनका लागि मौन अवधि सुरु हुने।
-
बेलुका ८:३० बजेदेखि: पहिलो चरणको मतदान औपचारिक रूपमा सुरु हुने।
प्रविधिमैत्री र डिजिटल माध्यमको प्रयोग
संशोधित निर्वाचन कार्यतालिका अनुसार प्रतिनिधिहरूको अन्तिम नामावलीलाई भौतिक रूपमा महाधिवेशनस्थल (भरतपुर प्रदर्शनी केन्द्र) मा टाँस गरिनुका साथै डिजिटल माध्यमबाट पार्टीको वेबसाइट र प्रतिनिधिहरू जोडिएका ह्वाट्स्याप ग्रुपहरूमा समेत तुरुन्तै पठाएर प्रविधिमैत्री व्यवस्थापन गरिएको छ।
अहिले महाधिवेशनस्थलमा उम्मेदवारहरूको अन्तिम नामावली प्रकाशन र मौन अवधिको तयारी तीव्र पारिएको छ भने बेलुका ८:३० बजेदेखि नयाँ नेतृत्व चयनका लागि मतदान सुरु हुनेछ।
