काठमाडौँ । सूचना तथा सञ्चारमन्त्री डा. विक्रम तिमिल्सिनाले नेपाली चलचित्र उद्योगका समस्या, चुनौती र अपेक्षाहूप्रति सरकार पूर्ण रूपमा संवेदनशील रहेको बताएका छन्।
चलचित्र विकास बोर्डको २६औँ वार्षिकोत्सव समारोहलाई सम्बोधन गर्दै मन्त्री तिमिल्सिनाले चलचित्र क्षेत्रको वास्तविक आवश्यकतालाई सम्बोधन गर्ने कानुन, नीति र कार्यक्रममार्फत उद्योगलाई सुदृढ बनाउन सरकार तयार रहेको स्पष्ट पारे।
बोर्डको सफलता चलचित्रकर्मीको समृद्धिमा निर्भर
सञ्चारमन्त्री डा. तिमिल्सिनाले चलचित्र विकास बोर्डले यस क्षेत्रको अभिभावकीय भूमिका जिम्मेवारीपूर्वक वहन गर्नुपर्ने आवश्यकता औँल्याए। बोर्डको योजना र बजेटले प्रत्यक्ष रूपमा चलचित्र उद्योगलाई कसरी लाभ पुर्याउँछ भन्ने विषय पहिलो प्राथमिकतामा पर्नुपर्ने उनको भनाइ थियो।
“चलचित्र क्षेत्र समृद्ध र सन्तुष्ट भएमा मात्रै बोर्डको सफलता अर्थपूर्ण हुन्छ। आगामी आर्थिक वर्षको बजेट बनाउँदा चलचित्रकर्मीको भावना समेट्ने गरी योजना बनाउनुस्,” मन्त्री तिमिल्सिनाले बोर्ड नेतृत्वलाई आग्रह गरे।
संसद्मा विचाराधीन चलचित्र विधेयकबारे सबैको सुझाव आवश्यक
संसद्मा विचाराधीन रहेको चलचित्र विधेयकलाई समयसापेक्ष र व्यावहारिक बनाउन सबै सरोकारवालासँग सुझाव लिइने मन्त्रीले प्रतिबद्धता जनाए। निरन्तर संवाद र सहकार्यबाट मात्र प्रभावकारी कानुन बन्न सक्ने उनको विश्वास छ।
वार्षिकोत्सव समारोहका मुख्य बुँदाहरू:
-
अग्रजहरूको सम्मान: पुराना पुस्ताका चलचित्रकर्मीको निरन्तर सङ्घर्ष र समर्पणकै कारण नेपाली चलचित्र आजको अवस्थामा आइपुगेको भन्दै मन्त्रीले आभार प्रकट गरे। साथै, चलचित्र क्षेत्रको इतिहास दस्तावेजीकरण गर्न अनुसन्धानमूलक पुस्तक प्रकाशनमा जोड दिए।
-
स्वस्थ प्रतिस्पर्धाको आह्वान: चलचित्र उद्योगलाई आर्थिक रूपमा सक्षम बनाउन चलचित्रकर्मीहरूबीच स्वस्थ प्रतिस्पर्धा, पारस्परिक सहयोग र सहकार्यको संस्कृति आवश्यक रहेको औँल्याए।
-
अन्तर्राष्ट्रिय बजारको खोजी: सञ्चार सचिव लक्ष्मी कुमारी बस्नेतले नेपाली चलचित्रलाई अन्तर्राष्ट्रिय बजारमा प्रतिस्पर्धी बनाउन गुणस्तरीय सामग्री, आधुनिक प्रविधिको प्रयोग र प्रभावकारी प्रवर्द्धनमा जोड दिइन्।
चलचित्रकर्मीको स्वास्थ्य बीमा र आगामी योजना: दिनेश डीसी
चलचित्र विकास बोर्डका अध्यक्ष दिनेश डीसीले नयाँ चलचित्र विधेयक निर्माणको चरणमा रहेकाले सम्पूर्ण सरोकारवालाहरूलाई सक्रिय रूपमा रचनात्मक सुझाव दिन आह्वान गरे।
अध्यक्ष डीसीले बोर्डका महत्त्वपूर्ण कदमहरूबाहेक निम्ति जानकारी दिए:
“हामीले वरिष्ठ चलचित्रकर्मीको सामाजिक सुरक्षालाई प्राथमिकतामा राख्दै स्वास्थ्य बीमा कार्यक्रम सञ्चालन गरेका छौँ। आगामी आर्थिक वर्षको बजेट चलचित्र उद्योगमैत्री र प्रभावकारी रूपमा आउनेछ।”
