काठमाडौं । नेपाल हुँदै अवैध रुपमा भारत आएकी पाकिस्तानी नागरिक सीमा हैदरले अहिले राष्ट्रपति द्रौपदी मुर्मुसमक्ष दयाको निवेदन दिएकी छन् ।
सीमा हैदरले राष्ट्रपतिसँग आफू र उनका प्रेमी सचिन मीणालाई आफ्ना चार छोराछोरीसहित ग्रेटर नोएडामा बस्न अनुमति दिन आग्रह गरेकी छन्।
समाचार एजेन्सी पीटीआईका अनुसार सर्वोच्च अदालतका वकिल एपी सिंहले सीमाको तर्फबाट यो याचिका दायर गरेका हुन्, जुन शुक्रबार राष्ट्रपतिको सचिवालयले प्राप्त गरेको थियो।
यस याचिकामा सीमाले आफू ग्रेटर नोएडामा बस्ने सचिन मीणासँग प्रेममा रहेको र उनीसँग बस्न भारत आएको बताएकी छन् ।
पाकिस्तानी नागरिक सीमा हैदरले आफूले हिन्दू धर्म परिवर्तन गरी मीणासँग काठमाडौंको पशुपतिनाथ मन्दिरमा हिन्दू संस्कारअनुसार विवाह गरेको दाबी गरेकी छन् ।
राष्ट्रपतिसमक्ष सीमाको निवेदनमा भनिएको छ, “आदरणीय महोदया, निवेदकले सचिन मीणालाई मायालु पतिको रूपमा, ससुरा बुवाको रूपमा, सासुको रूपमा शान्ति, माया र खुशी पाएकी छिन् जुन निवेदकले पहिले कहिल्यै पाइनन्। निवेदकले उनलाई विश्वास गर्न र धेरै शिक्षित महिलालाई दया देखाउन अनुरोध गर्दछिन्।”
याचिकामा सीमाले भनिन्, “यदि तपाईंले दया देखाउनुभयो भने, निवेदकले आफ्नो बाँकी जीवन श्रीमान्, चार नाबालक छोराछोरी र ससुरासँग बिताउनेछिन्। तपाईंले उनलाई मौका दिनुभएकोमा निवेदक आभारी हुनेछिन् र तपाईं उनको बल र समर्थनको स्रोत बन्न सक्नुहुन्छ। निवेदकले अन्ततः भारतमा सम्मानजनक जीवन बिताउन सक्षम हुनेछिन्।”
पाकिस्तानको सिन्ध प्रान्तकी बासिन्दा सीमा भन्छिन् कि उनी सन् २०१९-२० मा अनलाइन गेम पबजी खेल्दा सचिनको सम्पर्कमा आएकी थिइन् र दुवैले ह्वाट्सएप र इन्स्टाग्राममा कुरा गर्न थालेका थिए ।
सीमा गत अप्रिल ३ मा नेपाल हुँदै बसमा चार बालबालिकासहित अवैध रूपमा भारत प्रवेश गरेकी थिइन् । उनी भन्छिन् कि उनी ग्रेटर नोएडाको रबुपुरा क्षेत्रमा बस्ने सचिनसँग बस्न आएकी थिइन् ।
जुलाइ ४ मा स्थानीय प्रहरीले सीमा र सचिनलाई पक्राउ गरेको थियो । तर, स्थानीय अदालतले जुलाइ ७ मा धरौटीमा रिहा गरेपछि दुवै जना आफ्ना चार सन्तानसहित रबुपुराको घरमा बस्दै आएका छन् ।
